Prossimi eventi

  • Non ci sono eventi (per ora...)

Prossimi eventi

<< Set 2021 >>
lmmgvsd
30 31 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 1 2 3

Archivio post

Fâ cognossi il Friûl tal mont cu l’art antighe dal mosaic

Lis tantis sodisfazions di un imprenditôr preseât a nivel internazionâl e la passion pe storie e culture che lu fasin stimâ ancje in cjamp leterari

di Giuseppe Mariuz

CJASARSE. Di frut al meteve in rie claputs di tancj colôrs. A undis agns al veve costret sô mari a puartâlu a Splimberc par viodi la Scuele dai mosaiciscj e in chê volte il diretôr Severino Giacomello i veve dit: «Intant fâs lis mediis e dopo, se tu âs ancjemò voie, tu podarâs vignî a iscrivîti». A cutuardis agns, puntuâl, al jere tornât.

William Bertoia, nassût a San Zuan di Cjasarse tal 1943, in zoventût al à fat diviersis esperiencis cun biei risultâts, sedi di sport, tant di jessi campion di ciclisim, sedi tal cjamp de ristorazion. Ma, a partî dal 1980, al à bandonât dut par vierzi, cu la sô femine Rosanna Gasparotto, une dite che e coronave il so sium: la produzion di mosaics.

D’in chê volte, la Friulmosaic si è slargjade, e à cuviert di mosaics glesiis catolichis e ortodossis, hotels e moscheis, vilis e palaçs in 55 paîs dal mont. Par ultin e inmò in opare, plui di doi mil metros cuadris di mosaic tal grant Santuari de Nossa Senhora Aparecida, tal Stât di Saõ Paulo dal Brasîl, che al è stât visitât ancje di Papa Francesco.

La sede di Friulmosaic cumò e je a San Martin dal Tiliment, li che a lavorin cu la famee Bertoia (dos fiis e un nevôt) trente dipendents. Ma William al è ancje un intenditôr di storie e di art dal mosaic, tant che un so libri jessût di pôc, Meraviglie del mosaico (edizions L’Omino rosso), al è bielzâ considerât fondamentâl par chest setôr artistic. Lu intervistìn, ripuartant il so furlan di là da l’aga.

Cemût vêso rivât a slargjâsi tal forest?

«Si slargisi tal forest partecipant a fieris internazionals dolà ch’a si pos meti in mostra la capacitat artigianal e li’ ideiis novis».

Contial di jessi une dite furlane?

«Il fat di essi una dita furlana a ni met ta una posizion di rispiet. Ator pal mont, cuant ch’a si parla di prodot artistic talian e in particolar furlan, cun a li’ spalis la storia di Aquileia, si got subit di un credit. Se in pi i ti mets dongia li referenzis di lavours za fats, ben curats e finits, il risultat al è sigurat».

No saràn mancjadis esperiencis particolârs…

Ind’ai vudis diviersis. In Giapon, i parons di un hotel di Kyoto, par ringraziani dal biel lavour ch’i vevin fat, a ni àn compagnat cun fantatis in kimono a la Academia par assisti a la Danza dei ciliegi, un spetacul straordenari par custums, musichis, senografiis. Mancul biel al è stat in Kazachistan, cuant che i compains talians ch’a montavin l’aredamint mi àn lassat a piè, a disivot chilometros dal hotel, tal canteir da la vila dal President da la Republica. No bastarès un libri par contâ di esperienzis stranis: dal regal di un mantel da la cjasa real saudita, ch’a mi à fat un principe nevout diret dal re, dispicjanlu dal so armar a Ryad, a li nots passadis a durmî ta una cjamara di un colezionist miliardari di Karlsruhe, cun cuadris di Rubens e El Greco picjats ta li pareits e una scultura dal Canova coma soramobil».

Fasìn un confront jenfri sodisfazions e dificoltâts.

«Tal nustri lavour i pos afermâ che li sodisfazions a superin li dificoltats. Cuant ch’a si poia un mosaic, pareits o pavimints ch’a sedin, i ti sas ch’al è par secui. Li dificoltats a son doma di ordin burocratic o in rapuart a dutis li tassis ch’a si pain. Ma il lavour dur, li tantis oris in canteir o il stâ ator pal mont a vegnin paiats da la gran sodisfazion di essi calcolats mestris di un’art antiga. Il savê che i nevouts e i nevouts dai nevouts a podaran jodi, ator pal mont, i lavours fats ta la to vita, beh, a ti fan svualâ da la contentessa».

William, tu as altris passions…

«Dilà dal mosaic, doventat una profession, passions a ’nd è restadis dos, dopo che i ài bandonat la musica (di zovin i sunavi la fisarmonica) e cuasi dal dut la bicicleta, par via dal trafic periculous. Una a son li iconis, ch’a mi riessin abastansa ben e mi fan pensâ a l’aldilà. La seconda a è la scritura creativa: poesia (tancju ains fa mi àn encia premiat a un concors), tescj teatrài par furlan (rapresentats pi voltis tai ains Otanta). E ades un libri di storia dal mosaic, apena publicat con L’Omino rosso. E, cul stes editour ch’al à crudut in me, il me prin romans Il tesoro di Cromazio, ambientat tal sit archeologjc di Aquileia. La scritura a mi serf par sfogami cu la fantasia, serciant di coinvolzi chel ch’al les. I presenti i doi libris a Pordenonelegge e dopo via in Brasil, a finî di poiâ il mosaic da la gran cupola dal Santuari di Aparecida, a tegnî alta la bandiera dal Friûl».

08 settembre 2015

http://messaggeroveneto.gelocal.it/udine